باسم مليون و 800 الف متطوع اخرجت الامين العام لجمعية الهلال الاحمر السودانى عايدة السيد عبد الله فى منتدى الاتصال السنوى هواءً ساخناً لمن اعتبرتهم يحيكون المؤامرات فى جسم الجمعية المسخن بجراح فقد الاعزاء وهم فى ميادين العطاء والبذل، وقالت لا اقبل فى متطوعى الهلال الاحمر السودانى اى شئ، وهناك هلال احمر سودانى وااااحد فى السودان، والحديث عن تقسيم الهلال الاحمر هى احاديث ملفقة، وانكم بتلفيقاتكم وتصريحاتكم تسببتم فى مقتل 5 من موظفى الهلال والكلام ليكم يا (المنطتين عينيكم)
عايدة اكدت ان الجمعية مما بدت الحرب وحتى الان استلمت باخرتين اغاثة تركية ومصرية، السعودية والكويت جابو ووزعو بطريقتهم الخاصة، وقالت الاغاثات الجات ومعاها الاموال كلها لم تكفى خمس الاحتياج، وفى منظمات اممية نطت من التزامها، واكدت انه ليس هناك اى تنسيق مع الهلال الاحمر الاماراتى ولن يكون هناك تنسيق (قطع ناشف)
كلام كثير قالته الامين العام لجمعية الهلال الاحمر السودانى يخلص الى ان منظومة الهلال الاحمر او الصليب الاحمر الدولية شغالة بنظام الخيار والفقوس، وان السودان وحربه منسيون بل وهناك تعتيم على هذه الحرب.
